بعد انتصار سنة ٥٦ كان لنا هدف.. هدف كبير أن نبنى مجتمع جديد متخلص من آثار الاستغلال؛ استغلال الإقطاع واستغلال رأس المال.. نبنى مجتمع جديد يشعر أبناؤه فيه بالمساواة.. نبنى مجتمع جديد نذيب فيه الفوارق بين الطبقات، نقضى على المجتمعات القديمة التى قامت بين ربوع بلدنا، المجتمع القديم اللى قام على الاحتكار، واللى قام على الإقطاع، واللى قام على الاستغلال. وسرنا فى هذا الطريق، وقطعنا مشوار كبير من أجل بناء المجتمع الجديد. الاشتراكية؛ الاشتراكية هى الكفاية والعدل.. الاشتراكية هى الكفاية والعدل. معنى هذا أن نذيب الفوارق بين الطبقات، معنى هذا أن نبنى حتى نرفع مستوى الجميع. الاشتراكية مش معناها الفقر والتقشف، قد يكون التقشف مرحلة من المراحل، ولكن الاشتراكية معناها الرفاهية للجميع، والرأسمالية معناها الرفاهية لعدد من الناس، للرأسماليين.

الإقطاع معناه الرفاهية لعدد من الناس اللى هم الإقطاعيين، أما الباقى؛ الفلاحين والعمال يحرموا، ويؤخذ ناتج عملهم ليدخل جيوب الإقطاعيين والرأسماليين. الاشتراكية بعد القضاء على الإقطاع والقضاء على رأس المال المستغل، تسير فى طريق الكفاية والعدل لتبنى وتبنى باستمرار حتى يتحقق مستوى رفيع من المعيشة لكل الناس.

إذن ونحن نسير فى هذا الطريق؛ طريق بناء المجتمع الجديد نحتاج إلى جهد كبير ونحتاج إلى عمل؛ لأن لن نستطيع أن نرفع مستوى المعيشة الناس كلها إلا إذا زودنا الإنتاج؛ ودا السبب اللى من أجله بنقول ان احنا لازم نعمل ونعمل باستمرار لزيادة الإنتاج؛ معنى زيادة الإنتاج ان احنا فعلاً بنرفع مستوى المعيشة، بنذيب الفوارق بين الطبقات، ولكن هل النهارده مستوى المعيشة فى البلد مستوى واحد؟

لأ.. مستوى المعيشة فى البلد مش مستوى واحد، لسه فيه ناس بتقاسى من آثار الماضى. وأنا لا أستطيع أن أقول ان احنا فى الكام سنة اللى فاتوا دول - واحنا قعدنا لغاية سنة ٥٧ كان عندنا إنجليز وكنا بنكافح الاستعمار - ماقدرش أقول إن فى الكام سنة اللى فاتوا دول حققنا كل شىء، حنحتاج إلى عشرات من السنين حتى نقضى على البؤس الموجود فى عمال التراحيل والبؤس الموجود فى بعض الأنحاء، ولن تستطيع الاشتراكية فى يوم وليلة أن تقضى على هذا البؤس، لن تستطيع الاشتراكية فى يوم وليلة أن تقضى على الظلم الاجتماعى اللى قاسينا منه آلاف السنين، لن تستطيع الاشتراكية أن تغير وجه الدنيا بجرة قلم، ولكن نستطيع نحن - احنا الاشتراكيين اللى نعمل على بناء الاشتراكية - نستطيع بالعمل أن نخلق المجتمع الجديد فعلاً بان احنا نزيل البؤس بالتدريج. النهارده أعتقد ان احنا استطعنا أن نزيل البؤس بالنسبة لقطاع كبير من الناس، ولكن لازال أمامنا كفاح طويل، لازال أمامنا كفاح عنيف خصوصاً فى الأجواء التى تحيط بنا من كل مجال.

لم ننتصر فى قناة السويس بس، ولكن فى الإنتاج والخدمات والتحويل الاشتراكى، ولكنا انتصرنا فى تحقيق الديمقراطية السياسية والديمقراطية الاجتماعية، كما نص عليها الميثاق اللى صدر سنة ٦٢. والميثاق نص على الحرية السياسية والحرية الاجتماعية، وقال الميثاق: إنه لا يمكن أن تقوم حرية سياسية بدون قيام حرية اجتماعية؛ لأن عدم قيام الحرية الاجتماعية معناه أن الشعب سيخضع لسيطرة رأس المال المستغل، ويخضع لسيطرة الإقطاع، ويخضع لتحالف طبقة الإقطاع ورأس المال. وقررنا أن ٥٠% من المنظمات الشعبية ومن مجلس الأمة تمثل العمال والفلاحين، كان هدفنا فى هذا أيضاً أن نبنى مجتمع جديد، مجتمع ينتهى فيه التخلف والاستغلال والسيطرة لكى يبدأ عهد الكفاية والعدل وتكافؤ الفرص.

فى السنوات العشر منذ السويس وتأكيداً وتدعيماً لانتصار عظيم كامل شريف مجيد فاصل، حقق الشعب المصرى تحولاً ليس له مثيل فى بلدان العالم النامى كله. ليس هناك بلد وضع فى الصناعة مثلاً ١٠٠٠ مليون جنيه فى عشر سنوات، ومافيش بلد تحمل بمسئولية مشروع كمشروع السد العالى لتطوير الزراعة والكهرباء.

مافيش بلد حدث فيه التحول الاجتماعى اللى شهدته مصر، وانتقلت الثروة فيه من احتكار نصف فى المية من سكانه على حساب حرمان ٩٩.٥% من شعبه لكى تتحقق سيطرة كل الشعب على مقدرات الثروة، ويحدث هذا بأقل قدر من العنف، وبغير قطرة من دم على الإطلاق. مافيش هناك بلد تأكدت فيه لقوى الشعب العاملة كل أنواع التأمين المتاحة اجتماعياً لكفالة حياة حرة كريمة، المتاحة سياسياً لضمان وضع سلطاتها دائماً فى قيادة العمل الوطنى، كل التأمينات الاجتماعية الموجودة لغاية التأمين ضد البطالة حققناه.

ولا ندعى - أيها الإخوة - بهذا الكلام أن غيرنا من بلاد العالم النامى لم يتحرك، بالعكس احنا نرى تجارب باسلة تقوم بها شعوب حية، ولكننا نثق أنه حين تعد التجارب المرموقة فى هذا العصر - وتعد بإنصاف وتجرد - فإن التجربة المصرية تبقى أبرز النماذج وخير الأمثلة.

طبعاً أنا أما باتكلم معاكم باستمرار باتكلم على الماضى.. على اللى عملناه، وفى كلامى على الماضى لى هدف؛ الحقيقة احنا بنعمل عمل أكبر من قدرتنا، بنعمل على أن ننتقل من دولة متخلفة إلى دولة متقدمة.. بنعمل على نقل الدخل القومى من دخل محدود إلى دخل كبير، وزى ما قلنا بنضاعفه كل عشر سنوات؛ الدخل كان فى أول الثورة ٨٠٠ مليون، النهارده الدخل القومى ١٨٠٠ مليون.

نعمل على زيادة الإنتاج؛ الإنتاج فى أول الثورة كان ١٨٠٠ مليون، فى أول السنة دى وصل ٣٥٠٠ مليون، والأرقام دى قلتها لكم مرات عديدة قبل كده. بالنسبة للأجور وبالنسبة للتشغيل.. للعمالة، وبالنسبة للميزانية، أول ميزانية اشتغلنا فيها بعد الثورة كانت ١٩٤ مليون جنيه - مش ٢٠٠ - فى سنة ٥٣، الميزانية الأخيرة ١٢٠٠ مليون جنيه.

معنى دا إيه؟ معنى دا ان فعلاً مجالات العمل فى البلد كبيرة. وأنا بدى أقول لكم بقى حاجة؛ احنا بنعمل أكتر من طاقتنا.. بنعمل أكثر من طاقتنا، وبنصرف أكتر من طاقتنا، يعنى دخلنا أما بيكون ٦٠٠ مليون جنيه من الضرائب بنصرف ١٢٠٠ مليون جنيه.

بعدين بالنسبة للاستيراد من الخارج؛ بنستورد أيضاً أكتر من طاقتنا، والسبب فى هذا ان احنا مستعجلين. وبعدين بالنسبة للعمل فى الزراعة، بالنسبة للعمل فى الصناعة، بالنسبة للعمل فى الخدمات، بالنسبة للعمل فى النقل، بالنسبة للعمل فى كل المجالات انتقلت الدولة من دولة عبارة عن مجموعة من الإداريين والكتبة، إلى دولة تمارس فعلاً إدارة هذه المشاريع.

فيه حاجه بدى أقولها بقى بالنسبة لهذا الموضوع؛ واحنا ماشيين فى هذا الطريق ماكنتش متصور أبداً ان احنا فى سكتنا حنبلغ الكمال مية المية.. أبداً، زى ما فيه الإيجابى فيه السلبى، زى ما حنبنى مصانع زى ما حنغلط فى بعض الأمور، زى ما فيه ناس كويسين حيكون فيه ناس وحشين، زى ما فيه ناس حسنة التصرف حيكون فيه ناس تصرفهم سيئ.

طيب، هل احنا مش عايزين الكمال؟ لأ عايزين الكمال، ولكن لا يمكن فى هذه المرحلة اللى احنا بنشتغل فيها أكثر من قدرتنا ان احنا نوصل إلى الكمال فى كل شىء. بتيجى لنا مشاكل.. عندنا مشاكل موجودة؛ مشاكل فى المستشفيات، توسعنا احنا يمكن فى بناء المستشفيات، والجمعة دى سامع أنا شكوى ان بعض المستشفيات مافيهاش أدوية. الناحية الإيجابية ان احنا بنينا المستشفيات، الناحية السلبية ان بعض المستشفيات مافيهاش أدوية.

ولكن النواحى السلبية اللى بهذا الشكل نستطيع أن نتغلب عليها.. نستطيع، ولكن - نظراً لكبر المسئولية وكبر العمل اللى احنا بنقوم به، زى ما باقول لكم عمل أكبر مننا - نظراً لهذا لازم ننتظر الإيجابى والسلبى، ومش معنى هذا ان احنا ما نعالجش السلبى، ولكن يجب أن نعالج السلبى.

فيه مشكلة مواصلات فى القاهرة.. أنا عارف إن فيه مشكلة مواصلات فى القاهرة، باشوف الناس موجودة على المحطات نتيجة النمو والتوسع فى العمالة، والقاهرة زادت عن ٤ مليون، وانتم زدتم عن ٣٠ مليون. طيب اللى كان مابيركبش أتوبيس بيركب، بيقولوا هل ما زودناش الأتوبيسات؟ زودنا الأتوبيسات، وبعدين الكلام الأخير ان مهما جبنا أتوبيسات مافيش فايدة، الحل الوحيد ان احنا نعمل مترو تحت الأرض. اتكلمنا مع الاتحاد السوفيتى علشان نعمل مترو تحت الأرض، وهم وافقوا على أنهم يعملوا مترو تحت الأرض، بهذا بنحل المشكلة. لكن الحل الوحيد النهارده العملى لأزمة المواصلات ان أنا أزود التذاكر.. الحل الوحيد، لما حتزود التذاكر اللى بيركب له محطتين تلاتة فيستسهل إنه يدفع قرش يستخسر يدفع قرشين فى المحطتين التلاتة؛ وبهذا الناس بتمشى شوية جنب الأتوبيسات.. هو دا الحل العملى أن نرفع ثمن التذاكر، أنا باتكلم على تذاكر الأتوبيس مش على الرز، تذاكر الأتوبيس مش حتباع فى السوق السودا.. حد يطلع يشترى شوية تذاكر الليلة من السوق السودا، ولكن احنا رأينا إن ما نرفعش ثمن التذاكر بالعكس، وقلنا بنجيب أتوبيسات جديدة، وبنعمل مترو، وبنحسن فى المرور والطرق.

قصدى برضه من هذا المثل إن كل شىء فيه سلبى وفيه إيجابى. فيه أزمة مساكن موجودة، مطلوب منى أنا النهارده أبنى مساكن، قدرتى على بناء المساكن محدودة؛ لأنه موضوع اقتصادى.. موضوع مبنى على الأسمنت وعلى الحديد الموجود عندى، وأنا مااقدرش أستورد أسمنت وحديد من بره - ولو ان احنا السنة اللى فاتت استوردنا حديد من بره - لأنى ماعنديش عملة صعبة أدفعها ولا نقد أجنبى أدفعه أجيب أسمنت وحديد. دى المشكلة الموجودة؛ إذن المشكلة بنحاول نحلها بقدر الإمكان. وامبارح فى إنجلترا قالوا إنهم وقفوا حتى مشاريع الإسكان، رغم انها يعنى دولة كبيرة، ولكن اقتصادياً وقفوا عمليات البناء علشان يمنعوا التضخم.