مناقشات الرئيس جمال عبد الناصرفى اجتماع الهيئة البرلمانية للاتحاد الاشتراكى٢٥/٢/١٩٦٥- أول سؤال من السيد محمود أبو وافية: كيف يمكن تأمين تحالف قوى الشعب العاملة من تسرب أى نوع من أنواع الصراع إليها، وكيفية حفظ التوازن بين هذه القوى، وهل لأى من هذه القوى دور قيادى فى مسيرة التطور؟
* الرئيس: بالنسبة للتناقضات موجودة بين قوى الشعب العاملة، ولكنها لن تنقلب إلى تصادمات. فى المرحلة الحالية تأمين قوى الشعب العاملة بيتحقق بإدراكنا انها البديل الوحيد للتحالف القديم؛ الإقطاع والرأسمالية. كيف يمكن حفظ التوازن بين هذه القوى؟ إيه المقصود بالتوازن؟ أى مجتمع بيتكون من مجموعة قوى.. حنبص فى المستقبل وحنلاقى فيه مجموعة قوى: فيه المثقفين يمثلوا قوة، العمال نقاباتهم بتمثل قوة.. دا طبعاً بييجى بالمناقشة والعمل والبناء السياسى فى داخل الاتحاد الاشتراكى العربى، بييجى بالتوعية، بييجى بتلاحم هذه القوى مع بعضها. بعدين احنا مانخافش، احنا علينا نعمل هذا الواجب، وبعدين المستقبل بتقرره أجيال المستقبل، احنا لا نستطيع أن نقرر المستقبل إيه، أجيال المستقبل اللى احنا حنربيها النهارده هى التى ستقرر المستقبل.
هل لأى من هذه القوى دور قيادى؟ أبداً.. طبعاً المثقفين بالطبيعة حيكون لهم دور قيادى، وبعدين بأقول المثقفين ممكن يكونوا فلاحين، ممكن يكونوا عمال، ممكن يكونوا جنود، ممكن يكونوا رأسمالية وطنية، أيضا المثقف بطبيعته - لأنه مثقف - هو اللى بيكون له دور قيادى.
- السؤال الثانى من السيد العضو محمد عباس الشراكى: ما هو العلاج لعدم وجود علاقات روحية بين أعضاء الاتحاد الاشتراكى على كافة مستوياته؟
* الرئيس: أنا اتكلمت أيضاً فى هذا الموضوع، وباقول إن اللى حيوجد العلاقات الروحية هو التنظيم السياسى الذى نص عليه فى الميثاق، التنظيم السياسى فى داخل الاتحاد الاشتراكى، وانتم أيضاً عليكم مسئولية كبيرة فى هذا باعتباركم القيادات المنتخبة من كل البلد.. من الدوائر الانتخابية، الحقيقة عليكم واجب فى تعميق العلاقات الروحية. والمؤتمرات طبعاً بتفيد فى هذا الموضوع، ولكن بدى أقول إن الموضوع مش عملية سهلة، مش حنقدر فى يوم وليلة نقول ان احنا عمقنا العلاقات الروحية والترابطات بين أعضاء الاتحاد الاشتراكى.
- سؤال من السيد العضو سمير الهلالى: هل يمكن اشتراك أعضاء مجلس الأمة على الإشراف على ميزانية الخدمات فى المحافظات لتوجيه الاعتمادات لمشروعات أكثر فائدة؟
* الرئيس: باقول لكم طبعاً؛ لأن ميزانية الخدمات فى المحافظات حتجيلكم هنا مع الميزانية؛ لأن ميزانية الخدمات.. كل الميزانية بتيجى، ولكن أنا يعنى مش متصور إن عضو مجلس الأمة فى كل محافظة هو يشترك فى هذه العملية؛ لأن احنا حنعمل فى كل محافظة مجلس شعبى، والمجالس الشعبية أيضاً حيكون لها دور كدور مجلس الأمة بالنسبة للدولة، حيكون لها دور بالنسبة للمحافظة وبالنسبة للرقابة.
- سؤال من السيد العضو أحمد المدبولى: عقد اجتماعات الهيئة البرلمانية داخل دار الاتحاد الاشتراكى العربى.
* الرئيس: يعنى اللى أنا فاهمه انه مش عايزنا نجتمع هنا، عايزنا نروح فى الاتحاد الاشتراكى العربى؟
هو يمكن مافيش قاعة فى الاتحاد الاشتراكى العربى تقوم بالغرض زى ما بتقوم بيه هذه القاعة.
- السائل: حضور قادة الاتحاد لهذه الاجتماعات.
* الرئيس: واحنا يعنى موجودين معاكم النهارده، لكن مش ضرورى نحضر معاكم فى كل اجتماع.
- السائل: إيجاد صلات مستمرة، بين أعضاء الهيئة البرلمانية وبين قادة تنظيمنا السياسى.
* الرئيس: مافيش مانع طبعاً فى هذا.
- السائل: أن تكون الهيئة البرلمانية مجالاً لمناقشة الآراء والاتجاهات للتعرف على مختلف الآراء، والاستفادة مما يظهر مع قيادات جديدة.
* الرئيس: أيضاً مافيش مانع.
- السائل: تحديد وضع عضو الهيئة البرلمانية فى الاتحاد الاشتراكى حتى يمكن الاستفادة منه بصفة دائمة لخدمة التنظيم السياسى.
* الرئيس: طبعاً فى التنظيم السياسى اللى حيتعمل حيكون فيه الناس اللى عندهم الوقت، واللى عندهم الإمكانية من أعضاء مجلس الأمة، وإذا كان كل أعضاء مجلس الأمة أيضاً مافيش مانع.
- السائل: إشراك الوزراء فى حضور الاجتماعات التى تعقدها الهيئة البرلمانية.
* الرئيس: ممكن.. يعنى مش فى كل الاجتماعات، ممكن بالاتفاق مع رئيس الوزراء بعض الاجتماعات.
- سؤال من السيد العضو حسن حافظ: يطلب أن يعمل مواطنو كل محافظة فى مرافقها وإدارتها على قدر الإمكان؛ توفيراً للوقت والجهد، وتحقيقاً للحكمة التى من أجلها قام نظام الإدارة المحلية.
* الرئيس: برضه باعتبر دا موضوع يعنى إيه أنا ما أقدرش أجاوب برضه، يمكن بتوع الإدارة المحلية يقدروا يجاوبوا على هذا الموضوع أحسن منى.
- سؤال من السيدة العضو بثينة الطويل: ما هى العلاقة بين مجلس الإدارة والنقابات العمالية، ولجان الاتحاد الاشتراكى العربى؟
* الرئيس: هو ممكن كان يتقال فى السؤال إن فيه مشاكل؛ لأن الإدارة والنقابة ولجان الاتحاد الاشتراكى العربى متعددة، وبيحصل مشاكل وبيحصل تنافس وعايز بحث. احنا فعلاً بحثنا هذا الموضوع ولكن لم نصل فيه إلى شىء، لكن لا أتصور أن لجنة الاتحاد الاشتراكى العربى فى المصنع تجبر مجلس الإدارة على شىء، ولكن تستطيع لجنة الاتحاد الاشتراكى فى المصنع أن تبلغ المستوى الأعلى إن المصنع فيه الشىء الفلانى غلط، أو فيه شى بينفذ بالطريق اللى لا يتمشى مع المصلحة العامة.
النقابة العمالية.. طبعاً معروف إيه دور النقابة العمالية فى المصنع؛ انها بتبحث على ألا - أو بتقوم بواجب - ألا تهضم حقوق العمال فى المصنع، ولكن يجب أن يكون هناك فعلاً تعاون بالذات بين لجنة الاتحاد الاشتراكى والنقابات ومجلس الإدارة. وبعدين أنا عندى فكرة.. عايز أحط فى مجلس الإدارة ممثل للنقابة، يعنى رئيس النقابة وممثل للاتحاد الاشتراكى - أمين الاتحاد الاشتراكى - على أن يشتركوا فى المناقشات ولا يكون لهم حق التصويت؛ يعنى يكونوا أعضاء موجودين منتسبين فى مجلس الإدارة، وهذه الفكرة حنبحثها، وبأعتقد إن وجود ممثل للاتحاد الاشتراكى ووجود ممثل للنقابة مع مجلس الإدارة قد يبلور العلاقة اللى بتسأل عنها السيدة بثينة الطويل.
- سؤال من السيدة العضو ألفت كامل: لماذا لا يمثل القطاع النسائى فى الأمانة العامة للاتحاد الاشتراكى العربى ليؤدى واجبه فى هذا السبيل؟
* الرئيس: هو الحقيقة احنا لسه ما بحثناش هذه النقطة بالذات.. يعنى مش ضرورى تمثل.. مش ضرورى يعنى يحصل تمثيل فى الأمانة، ولكن ممكن نبحث التنظيم النسائى. ولكن احنا الحقيقة بنحاول نعيد التنظيم فى جميع النواحى، ولن نهمل القطاع النسائى، حيكون فيه قطاع نسائى، وحيكون فيه تنظيم خاص بالقطاع النسائى.
- سؤال من السيد العضو أحمد جاويش: عن موعد اجتماع المؤتمر العام للاتحاد الاشتراكى.
* الرئيس: ليه ما اقدرش اقولك عن الموعد؟ دا متوقف على البناء اللى حنعمله فى إقامة الاتحاد الاشتراكى.
- سؤال: هل ستجرى انتخابات الاتحاد الاشتراكى فى نهاية هذا العام؟ أم الأفضل بقاؤه مع تطعيمه بالكفاءات حتى يؤدى دوره على الوجه الأكمل؟
* الرئيس: احنا لغاية دلوقت ملتزمين بالقانون، ولم نغير أى شىء من قانون الاتحاد الاشتراكى.
- سؤال من السيد العضو صبرى القاضى: ألا يحسن إبعاد المعزولين السياسيين عن المراكز القيادية فى الدولة والشركات والمؤسسات، مع عدم حرمانهم من حقهم فى المرتبات والمعاشات؟
* الرئيس: أنا رأيى فى هذه المواضيع يمكن ناس معزولين سياسيين نرفع عنهم العزل السياسى إذا كانوا ناس ماشيين كويسين. أنا رأيى ان احنا بنشوف الأمور بالنسبة للشخص، وبالنسبة لتصرف الشخص، وان احنا هدفنا إن المجتمع كله بيسير كأعضاء عاملين لتحقيق الميثاق. لكن السيد صبرى القاضى إذا كان عنده آراء بالنسبة لبعض الناس المعزولين السياسيين، بيقول لنا على هذا الكلام اللى بالنسبة للحراسة.
بالنسبة لمعاشات الحراسة أيضاً بدى أقول لكم حاجة ان احنا بنعيد النظر لمعاشات الناس اللى اتجعلوا تحت الحراسة؛ بحيث إذا وجدنا إن فيه ناس معاشاتها طلعت قليلة نتيجة الـ ٣٠ ألف جنيه بينهما معاشات استثنائية.
- سؤال من السيد العضو حامد عبد اللطيف: يطلب أن يصدر قرار من الهيئة البرلمانية - باعتبارها الهيئة المنتخبة - بضم جميع أعضاء الأمانة العليا الذين ليسوا أعضاء بالهيئة حالياً إليها. يطلب أن تقوم الهيئة البرلمانية بجميع الأنشطة، وأن تنبع منها هيئة الأمانة العامة للاتحاد الاشتراكى العربى.
* الرئيس: أنا الحقيقة يا أخ حامد مش موافقك على الاثنين مادام هيئة برلمانية يبقى الهيئة المنتخبة تمثل البرلمان، وبعدين الأمانة العامة للاتحاد الاشتراكى مافيش داعى تنبعث من البرلمان أو تنبعث من اللجنة البرلمانية.
- سؤال من السيد العضو حسن حافظ: يلاحظ أن هناك تشابه وخلط بين واجبات واختصاصات اللجان النقابية ولجان الوحدات الأساسية فى تنظيمات الاتحاد الاشتراكى العربى، وخاصة فى المصانع والشركات، وبالنسبة لأعضاء مجالس الإدارة المنتخبين، أرجو تفسير ذلك.
* الرئيس: احنا برضه شايفين ان فيه تشابه وخلط، وبنبحث إزاى نحل هذه المشكلة.
- السائل: أقترح إلغاء الانتخابات المباشرة للنقابات على مختلف مستوياتها، على أن تنبع اللجان النقابية من لجان الاتحاد الاشتراكى على جميع مستوياته؛ بحيث يمثل كل فرع من هذه اللجان النشاط النقابى على كل مستوى.
* الرئيس: بيوضع هذا الاقتراح ضمن الاقتراحات اللى بنشوفها فى بحث هذا الموضوع.
- سؤال من السيد العضو جمال أحمد سعيد: ألم يحن الأوان لتنحية الأشخاص الذين يتبوءون بعض المراكز التنفيذية الهامة ممن لم تقبل عضويتهم فى الاتحاد الاشتراكى العربى عن تلك المراكز؟
* الرئيس: أيضاً هذا الموضوع .. موضوع الناس كلها اللى بتشتغل فى الدولة وفى المؤسسات والشركات هو الآن موضوع دراسة.
- سؤال من السيد العضو أحمد حرك: طلب إجراء انتخابات جديدة للجان الاتحاد الاشتراكى بسبب العناصر الانتهازية.
* الرئيس: وممكن يعنى فى الانتخابات الجديدة أيضاً تطلع لنا عناصر انتهازية، ولكن زى ما قلت إن احنا لغاية دلوقت ملتزمين بالقوانين.
- سؤال من السيد العضو علوى حافظ: إلى أى مدى انتهت الدراسات الخاصة بتمثيل الجنود داخل التنظيم السياسى بمستوياته المختلفة؟
* الرئيس: هو فى الحقيقة احنا عايزين أولاً نقيم التنظيم السياسى ونوقفه على رجليه، وبعدين أقدر فى هذا الوقت أدخل واخلط عليه تنظيم الجنود. لكن من الميزات الأساسية اللى شفناها إن الجيش اللى قام سنة ٥٢ بالثورة فضل محافظ على المبادئ الحقيقية، بيهمنا جداً ان احنا نحافظ على المكسب اللى حققناه فى الجيش فى الاثنى عشر سنة اللى فاتت. أصعب حاجة بعد ثورة بالجيش إنك بتلم الجيش تانى وترجعه لشغله الاساسى، احنا لمينا الجيش ورجعناه إلى شغله الاساسى، عايزين نبنى النهارده الاتحاد الاشتراكى، وبعد ما نبنى الاتحاد نبتدى نخلط بين اللجان اللى موجودة فى الجيش واللجان المدنية الموجودة فى الاتحاد الاشتراكى. طبعاً فى الجيش فيه توعية وفيه تنظيم وفيه تمثيل، واحنا لغاية دلوقت مقتصرين على الأخ عبد الحكيم إن هو بيمثل الجيش بالنسبة للاتحاد الاشتراكى، ممكن نخلط أكثر وأكثر.
- سؤال من السيد العضو علوى حافظ: أرجو إيضاح التزامات وسلوك ومهمة وأبعاد مسئولية أعضاء مجلس الأمة حرصاً على سلامة التنظيم السياسى، خاصة وأننا نلاحظ أن نسبة من الأعضاء تمارس:
١- قياداة أدوات الإنتاج فى القطاع العام.
٢- الاتصال بالدائرة الانتخابية لمعرفة وجهات نظر المواطنين.
٣- الخدمة فى مستويات التنظيم السياسى ولجانه.
٤- دائرة حياته الخاصة فى الإطار الاشتراكى.
* الرئيس: هو بالنسبة لعضو المجلس احنا فى الحقيقة فى دولة اشتراكية، الأساس بالنسبة للنظام الاشتراكى إن كل واحد حيعمل علشان يعيش، فما أقدرش أقول إن اللى يدخل مجلس الأمة يسيب عمله الحقيقة، وإلا بهذا كل واحد يفضل انه يقعد فى شغله ولا يدخلش مجلس الأمة، فاحنا فى الدستور استثنينا أساتذة الجامعة وكل المؤسسات العامة، ما استثنيناش الموظفين على أساس إن الموظف عمله الحقيقة إدارى، ولكن الموظف - دا أصلاً موجود من الأول فى النظام الرأسمالى - كان النائب بيبقى نائب ويبقى عضو مجلس إدارة شركات، ويأخذ من البرلمان كان خمسين جنيه، وبيأخذ من بره خمسين ألف جنيه. فإذن بالنسبة للعمل يجب أن نحافظ على عمل النائب، وإذا كان فى قيادة الإنتاج أو فى القطاع العام لابد انه يفضل فى قيادة الإنتاج أو فى القطاع العام. طبعاً هذا لا يتنافى مع انه يتصل بدائرته الانتخابية، وإلا ما كانش نجح أو ما ينجحش بعد كده. والخدمة فى لجان المجلس والخدمة فى مستويات التنظيم السياسى ولجانه، وأيضاً فى باقى الدوائر اللى بيتكلم عليها السيد علوى حافظ، الالتزامات والسلوك والمهمة، ومهمة وأبعاد مسئولية أعضاء المجلس.. يعنى مش متصور إن أنا حأقدر أحددها فى عملية واضحة وعملية باينة.
- سؤال من السيد العضو إبراهيم القاضى: تدعيم وتنظيم أجهزة الاتحاد الاشتراكى على مستوى المراكز والمحافظات لدفعها نحو العمل الوطنى الخلاق.
* الرئيس: هو احنا عايزين قبل ما نعمل هذا الموضوع بنعمل الجهاز السياسى، بعد ما نقيم الجهاز السياسى بندعم أجهزة الاتحاد الاشتراكى على مستوى المحافظات.
- سؤال من السيد العضو عبد الرؤوف فهمى خليل: مدى قوة الرابطة بين القاعدة الشعبية وقيادتها فى حالة أمناء المحافظات الذين تقدموا لانتخابات مجلس الأمة ولم ينجحوا، ولا يزالون يتصدرون قيادة التنظيم فى المجال الشعبى.
* الرئيس: والحقيقة أنا فى رأيى ان احنا عايزين أمناء المحافظات يكونوا متفرغين. حتى ما يكونوش من النواب؛ لأن النائب أما بييجى بيقعد هنا جمعة بيبعد عن المحافظة، لازم يكون واحد الحقيقة قاعد متفرغ بيشتغل، ولكن.. (تصفيق).
ولكن مش معنى هذا طبعاً انه بيخبط منك الدايرة؛ بحيث ترجع تيجى الانتخابات الجاية وهو بيدخل قصادك وبينجح وإنت تسقط. يعنى فى هذه العمليات لازم فى الانتخابات الجاية بيكون لنا نظام بالنسبة للترشيح، والاتحاد الاشتراكى لازم يقوم بدور، فما تخافش أبداً من هذه النقط. ولكن أنا باقول مثلاً النائب - زى مابيقول علوى حافظ - بيتصل بالدايرة، ويقوم بشغله، وبيخدم فى لجان المجلس، وبيخدم فى مستوى التنظيم السياسى ولجانه، وعنده عمل كثير جداً، الحقيقة لا يمكن انه يقوم بعملية الأمانة للمحافظة. بعدين احنا - أيضاً - بحثنا موضوع الناس اللى سقطوا، وأوضاع المحافظات، وبعد مارس - بعد الاستفتاء - حنعيد النظر بالنسبة للمحافظات، ولكن عايزين أيضاً نكون عملنا التنظيم السياسى، بيكون فيه عدد من الناس المتفرغين؛ لأن هو دا حيكون العصب بتاع الاتحاد الاشتراكى.
- سؤال من السيد العضو قاسم أحمد طعيمة: عن الحكمة فى تعدد القيادات والأمانات فى منظمات الاتحاد الاشتراكى العربى بعد أن لمسنا منه عدم توحيد الكلمة والتوجيه الصحيح نحو السلوك الاشتراكى البنّاء.
* الرئيس: أنا والله مافهمتش هذا السؤال وعايز الأخ طعيمة يشرح لنا.
(وهنا شرح السيد قاسم أحمد طعيمة سؤاله).
* الرئيس: هو الحقيقة الحكمة فى هذا التنظيم هى الآتى:
هو الاتحاد الاشتراكى كاتحاد اشتراكى موجود، بس ستة مليون بنحس إن فيه نقص موجود، إيه نقص؟ اللى هو ينظم الناس ويخلق الأجهزة السياسية زى ما هو موجود فى الميثاق، فاحنا مثلا ماعملناش لجنة اقتصادية، ولجنة خطة، ولجان.. وكلام اللى بهذا الشكل، وقلنا لازم السنة الأولى نركز على التنظيم وربط الناس بالاتحاد الاشتراكى، ومعرفة العناصر القيادية علشان نكون منها الجهاز السياسى، وبدونها لن نستطيع - بأى حال من الأحوال - ان احنا نقيم عصب الاتحاد الاشتراكى، حيفضل قدامنا الاتحاد الاشتراكى على الورق، فيه قيادة وفيه لجان، ولكن الاتحاد مالوش فاعلية. علشان ننظم الناس يبقى لازم نتبع الطريقة المثلى فى هذا؛ وهى الطريقة اللى بتتبعها الأحزاب؛ يعنى لما نبص لأى حزب بنجد انه عنده فرع للطلبة وفرع للعمال وفرع للفلاحين وفرع لهذا وفرع لذاك، مافيش تناقض أبداً بين هذه العملية، بل بالعكس أمانة، يعنى أمانات الاتصال بين وجه قبلى ووجه بحرى الغرض منها ان احنا نتصل بأمانات المحافظات، ويكون فيه اتصال يومى بين أمانة المحافظة وقيادة الاتحاد الاشتراكى أو أمانة الاتحاد الاشتراكى الموجودة.
فى نفس الوقت الفلاحين أيضاً عندهم مشاكل وعايزين منهم عناصر قيادية، تستطيع أمانة الفلاحين انها حتكون فى كل محافظة أمانة أيضاً للفلاحين، ونشوف فلاحين الإصلاح الزراعى ونوجه الناس. احنا مسئوليتنا إيجاد الجيل الجديد اللى حيتولى القيادة، الحقيقة هذا الجيل لغاية دلوقت لم ننجح فيه، لن نستطيع ان احنا نكتشف هذا الجيل إلا بالاتصال الشخصى والاتصال المباشر، دا كان السبب اللى خلانا عملنا هذه الأمانات، وهذا لا يمنع ان احنا بعد ما ننجح حنوحد، ما احناش عايزين نقسم الاتحاد الاشتراكى إلى عمال وفلاحين؛ لأن تقسيمه بيكون إيه، انه فى الاتحاد جناح عمال وجناح فلاحين، والدليل على هذا ان احنا مثلاً فى الأسبوع دا وحدنا أمانة العمال والموظفين وعملناهم أمانة واحدة.
الموضوع الثانى اللى احنا حنتكلم فيه ضمن الأسئلة اللى هو خاص بالادخار.
- سؤال من السيد العضو كمال بدر: يطلب ضمان الحكومة للمدخرات الصغيرة، مع ضمان القيمة الإسمية لأسهم صغار المدخرين فى الشركات التى ساهموا فيها.
* الرئيس: أعتقد فيه إجراءات عملت بالنسبة للمدخرين فى الشركات اللى قامت بها الحكومة، الحقيقة مانقدرش ندى القيمة الاسمية لسبب؛ لأن فيه ناس اشترت الأسهم وباعت السهم مثلا بـ٨٠ قرش، وهو يساوى ٢ جنيه، أما أجى أنا النهارده أقول ان أنا حاضمن تمن السهم اتنين جنيه، معنى هذا ان أنا حادى ١٢٠ قرش زيادة للى أشترى السهم من البورصة بـ٨٠ قرش؛ ولذلك عملنا بدل من هذا شهادات الاستثمار، الحكومة ضامنة، يعنى ضامنة المدخرات الصغيرة.. ماقولناش أبداً إن احنا حناخد المدخرات لا الصغيرة ولا الكبيرة، ليس فى الميثاق ما ينص على إن الحكومة حتاخد مدخرات الناس الصغيرة أو الكبيرة. المدخرات اللى كانت موجودة فى الجمعية التعاونية للبترول عملنا بها أيضاً شهادات استثمار، بالنسبة للشركات اللى عملناها ونزلت أسهمها عملنا بها شهادات استثمار.
- سؤال من السيد العضو الدكتور سالم محمد شحاته: يرى ضرورة الاهتمام بالسلوك الاشتراكى للفرد فى مجتمعنا الاشتراكى حتى يمكن تطبيق الاشتراكية تطبيقاً عملياً بين جميع الطبقات؛ فنتمكن من الحد من جشع التجار الذين يبالغون فى رفع أسعار السلع الضرورية وتخزينها، والقضاء على مظاهر الإسراف فى إقامة القصور الفخمة لرجال الحكم المحلى على حساب الفلاح الكادح، وهو أولى بأن تنفق عليه هذه الأموال.
* الرئيس: بالنسبة للجزء الأخير هو طبعاً رجال الحكم المحلى لازم نبنى لهم سكن، أما إذا كان قصور فخمة لهم بدل سكن.. فدا بيكون انحراف. طبعاً التنظيم السياسى هو اللى حيمكننا من أن نهتم بالسلوك الاشتراكى للفرد فى مجتمعنا، وأيضاً الجمعيات التعاونية. إذا مشينا فى الطريق الصحيح هو السبيل اللى يمكننا من إن احنا نمنع جشع التجار ونمنع الاستغلال.
- سؤال من السيد العضو سالم محمد شحاتة: يريد بياناً شافياً عن اشتراكيتنا العملية، هل هى اشتراكية مادية ملحدة أم اشتراكية مادية لا روحية؟
* الرئيس: اشتراكيتنا هى اللى فى الميثاق، لا هى مادية ملحدة، ولا هى مادية لا روحية، ولا هى مادية بس، ولا هى روحية بس، ولا هى ماركسية. وأنا اتكلمت على الاشتراكية وقلت الاشتراكية تنبع من ظروفنا، وعايز تعرف إيه الاشتراكية بتاعتنا بتقرأ الميثاق وتعرف إيه هى الاشتراكية بتاعتنا، واللى يقول لك إن اشتراكيتنا ملحدة حط صباعك فى عينه، واللى يقول لك اشتراكيتنا مادية بس حط صباعك فى عينه، وقول له إن هذا الكلام مش موجود فى الميثاق، تبين السيد سالم شحاتة هل دا بيان شافى؟
(وقال السيد العضو إنه أراد بسؤاله أن يرد السيد الرئيس على الأقاويل التى يرددها أعداء الثورة من إن اشتراكيتنا اشتراكية مادية وليست روحية).
طبعاً أنا فى يوم... فى نوفمبر هنا اتكلمت فى هذا الموضوع، قلت إيه العملية، لازم أى شىء الحقيقة بيكون على أساس علمى، وإنتم بتكلموا الناس فى هذا الموضوع، مش معقول نقول إن احنا اشتراكيتنا روحية بس، ونقعد مانصنعش ولا نخططش؟! اشتراكيتنا هى اشتراكية مادية واشتراكية روحية، يعنى إيه مادية؟ يعنى مش معقول أبداً أقول إن أنا أخلى الناس ماتجوعش، وما أبنيليهاش مصانع؛ لأن إذا مابنيتش مصانع حتجوع الناس، وبعدين مش ممكن أقول إن الراجل ما يسرقش، وأنا ما بأديلوش أجر يوكل عياله، اللى مش لاقى أكل يوكل عياله وماعندوش أجر وعاطل حيسرق غصب عنى وغصب عن كل واحد، فإذن اشتراكيتنا مادية، واشتراكيتنا أيضاً فى نفس الوقت روحية.
- سؤال من السيد العضو عبد الجابر علام: أرجو تفسير الرأسمالية الوطنية غير المستغلة.
* الرئيس: معنى الرأسمالية الوطنية غير المستغلة هى صغار الرأسماليين، الراجل اللى ما بيستغلش عمل الآخرين لنفسه، هو دا التعبير الصحيح.. يعنى اللى مابيستغلش عمل الآخرين لنفسه. ييجى واحد عنده مصنع وفيه عشرة آلاف عامل أو ألف عامل أو٥٠٠ عامل، أنا باقول إن دى رأسمالية مستغلة، بعد كده احنا سايبين اللى عنده ١٠ عمال وعنده٢٠ عامل وعنده ٣٠ عامل، سايبينه وبنقول إن هو بياخد قدر عمله والعامل بياخد قدر عمله.
- سؤال من السيد العضو إسماعيل السيد إسماعيل: لماذا ترك أصحاب المؤسسات المؤممة يعملون بها وبمجالس إدارتها، مع العلم أنهم غير مخلصين للنظام الاشتراكى؟
* الرئيس: هو فيه ناس احنا سايبينهم فى الحقيقة، ولغاية دلوقت هم مخلصين، يعنى ما نقدرش نقول انهم... يعنى ما قاموش بأى حاجة عدائية، اللى بيقوموا بأى عمل عدائى بنشيلهم. بعدين برضه هؤلاء الناس هم من المجتمع، العضو الصالح فيهم.. العضو الطيب فيهم بندى له فرصة انه يشتغل، وبيعتبر إن العمل فى هذا حق له.
- سؤال من السيد العضو سيد جلال: يطلب النظر فى تمليك العمال والموظفين ٢٥% من المصانع التى يعملون بها؛ وذلك بتقسيط ثمنها على عشر سنوات مقابل جزء من الأجور والأرباح المخصصة لهم، وفى ذلك حافز لهم على زيادة الإنتاج .
*
الرئيس: هو أنا ردى على هذا نقطتين؛ النقطة الأولى إن دا مضاد للميثاق.. هذا
الاقتراح ضد الميثاق. النقطة الثانية إن التجارب اللى اتعملت على هذا الأساس فشلت،
والتجربة الأساسية فى هذا هى تجربة حصلت فى انجلترا فى شركة الـ
I.C.I ملكوا العمال
أسهم، وجم العمال انزنقوا آخر الشهر راحوا كلهم بايعين الأسهم، خلوا الشركة خسرت
عشرين مليون جنيه. فاحنا نعمل قطاع عام، ونشجع العامل على زيادة الإنتاج، بندى له
نسبة مئوية من الأرباح، أما تمليك العامل النهارده معناها رجوع.. حاخلق تانى طبقة
رأسمالية، وحاقلل بهذا سيطرة الشعب على وسائل الإنتاج، الكلام اللى اتقال فى
الميثاق.
(أوضح السيد
العضو سيد جلال أنه لا يمكن أن يفكر فى مخالفة الميثاق، ولكنه قدم هذا الرأى على
أساس أنه يتماشى مع تمليك الفلاحين للأرض).
الجزء الخاص
بالميثاق - أنا قدامى الميثاق - "فى مجال الصناعة يجب أن تكون الصناعات الثقيلة
والمتوسطة والصناعات التعدينية فى غالبيتها داخلة فى إطار الملكية العامة للشعب.
وإذا كان من الممكن أن يسمح بالملكية الخاصة فى هذا المجال، فإن هذه الملكية الخاصة
يجب أن تكون تحت سيطرة القطاع العام المملوك للشعب وفى ظله، يجب أن تظل الصناعات
الخفيفة بمنأى دائماً عن الاحتكار، وإذا كانت الملكية الخاصة مفتوحة فى مجالها فإن
القطاع العام يجب أن يحتفظ بدور فيها ليمكنه من التوجيه لصالح الشعب، يجب أن تكون
المصارف فى إطار الملكية العامة، فإن المال وظيفته وطنية لا تترك للمضاربة أو
للمغامرة. كذلك فإن شركات التأمين لابد أن تكون فى نفس إطار الملكية العامة ضماناً
لحسن توجيهها والحفاظ عليها.
فى المجال
العقارى يجب أن تكون هناك تفرقة واضحة بين نوعين من الملكية الخاصة؛ ملكية مستغلة
أو تفتح الباب للاستغلال، وملكية غير مستغلة تؤدى دورها فى خدمة الاقتصاد الوطنى
كما تؤديه فى خدمة أصحابها".
دا الكلام
الخاص بالميثاق، فبعد النهارده ما أممت.. لا أستطيع إن أنا أفك التأميم أبداً بعد
أى شئ ما دخل فى الملكية العامة للشعب. بعدين أنا أدى الناس٢٥% من الأرباح، وبأديهم
١٥% خدمات، و١٠% بياخدوه أموال، كونى النهارده أوزع عليهم٢٥% من الأسهم بتلخبط كل
النظام اللى احنا بنشتغل فيه، وتدخلنا فى نظام تانى غير النظام الاشتراكى، وزى ما
قلت.. لو يتزنقوا العمال اللى عندك ويبيعوا الأسهم اللى فى المصانع، السهم أبو
اتنين جنيه حبيعه بـ ١٨٠ قرش، وبعدين ١٧٠ قرش، وبعدين ١٥٠ قرش، تبص تلاقى نزلت
الأسهم، ولكن الملكية العامة للشعب معناها أن المصنع ملكيته عامة للشعب، بما فيهم
العمال اللى هم موجودين فى داخل المصنع.
- سؤال
من السيد العضو كمال بدر: يطلب أن تنظر الحكومة بعين الاعتبار إلى بعض الهيئات
الكادحة، مثل فئات المحامين وأسرهم الذين تأثرت دخولهم نتيجة التحول من نظام
رأسمالى إقطاعى إلى مجتمع اشتراكى ديموقراطى.
*
الرئيس: واحنا قلنا بننشىء جهاز للمرافعات وللقضايا، وبنأخد عدد من المحامين فى
الدولة، واعتقد أن السيد رئيس الحكومة بيبحث هذا الموضوع، وأيضاً جهاز للمحاسبات
بالنسبة للقطاع العام. هذا بالإضافة إلى إن احنا سمحنا له بأنهم يحصلوا على الأتعاب
المتأخرة بحيث يقدروا يدوا منها معاشات.
- سؤال
من السيد العضو الدكتور سالم محمد شحاته: طريقة معالجة النشاط الشيوعى الملحوظ
فى الأيام الأخيرة، هل هى بالتصدى له بالمناقشة والإقناع؟ أم أن واجباتنا تقتضينا
توحيد الصف والفكر بعدم فتح جبهة فى هذه الظروف؟
- وسؤال
من السيد العضو أحمد سعيد: بيان حقيقة وجهة النظر الخاصة بإتاحة فرص الحياة
للشيوعيين على أمل اندماجهم فى مجتمعنا الاشتراكى الجديد، خصوصاً بعد إيجاد حساسية
لدى الكثيرين تحاول الرجعية مع الاستعمار استغلالها ضد ثورتنا.
*
الرئيس: بالنسبة للشيوعيين احنا اعتقلناهم فى سنة ٥٩؛ الحقيقة لانحرافات
معروفة. احنا أخرجناهم فى العام الماضى؛ لأن أنا وعدت إن قبل الدستور مش حيكون فيه
حد فى المعتقل، ولأن وجودهم فى المعتقل الحقيقة كان يمثل عبء فوق أكتافنا، ماكانش
فيه داعى أبداً ان احنا نخليهم فى المعتقل.
فى رأيى أن
جزء كبير من الناس اللى كانوا شيوعيين ممكن أن ينصلح حالهم ويندمجوا فى المجتمع
الاشتراكى الجديد، ولا نستطيع أن نحكم على الشيوعيين كلهم حكم واحد، نقول إن كل
اللى كانوا شيوعيين حننبذهم، بالعكس، أنا باقول ان احنا لازم نديهم فرصة العمل،
نهيئ لهم أسباب الحياة، لا نطاردهم، وبعدين بنشترط عليهم الآتى: ألا يقام تنظيم
شيوعى، اللى بيعمل تنظيم شيوعى نعتقله؛ لأنه يخضع للقانون اللى بيدى رئيس الجمهورية
السلطة فى اعتقال من كان معتقلا قبل الدستور.
وبعدين
ماناخدش مواضيع الشيوعيين بحساسية، ليه الشيوعيين النهارده بنقول إنهم لهم نشاط؟ طب
وليه احنا فى الاتحاد الاشتراكى ماليناش نشاط؟ يعنى يجب ان نشاط الاتحاد الاشتراكى
يجب نشاط الشيوعيين. وأنا متتبع نشاط الشيوعيين. هم مجموعة من الناس أو عدد قليل من
الناس بيحاول يتكلم، وبيحاول يدى نفسه الحق، أو بيحاول يقول إنه على حق، أنا فى
رأيى ان احنا مانخافش منهم أبداً..
بالنسبة
لأحمد سعيد، أحمد سعيد اتكلم على الصحافة وقال ان احنا حنسلم الصحافة للشيوعيين،
وأنا سمعت هذا الكلام. مش ممكن نسلم الصحافة للشيوعيين، أنا أما عينت خالد محيى
الدين فى أخبار اليوم أنا عارف إن خالد محيى الدين هو جزء من النظام، مش جزء من
الشيوعيين..(تصفيق) وأنا اتكلمت مع خالد محيى الدين، وواثق من الكلام اللى قاله لى
خالد محيى الدين، فاحنا مابنسلمش أبداً الصحافة للشيوعيين.
وبعدين احنا
لا نسمح لأى واحد انه يعمل تنظيم فى البلد، وبعدين أنا باقول إن أى واحد يقول إنه
"ماركسى"، هو "ماركسى" هو حر، لكن بيعمل تنظيم سياسى بنقول له دا يتنافى مع تحالف
قوى الشعب العاملة. الناس اللى مابيدخلوش فى تنظيمات وعايزين يدخلوا الاتحاد
الاشتراكى، لغاية دلوقت ما أخدناش منهم ناس فى الاتحاد الاشتراكى، ولكن سينظر فى
طلباتهم فرداً فرداً.. كل واحد على حدة ننظر فى طلبه ونشوف - وفقاً لسلوكه، ووفقاً
لاتجاهاته - إذا كان فعلاً يؤيد الميثاق، وماشى على أساس الميثاق، وماشى فى الاتحاد
الاشتراكى.
برضه أحب
بالنسبة للعضوين، على أساس ان السؤالين دول هما اللى عندى عن الشيوعية، إذا كان
عندهم كلام فى هذا الموضوع يتكلموا.
هو أنا بدى
إذا سمحت، لى كلمة ان احنا عايزين فى الجلسات اللى بهذا الشكل، كل واحد فى نفسه
حاجة يقولها. ( تصفيق).
وبعدين
ماحدش يزعل ولا حدش يعترض، واحنا ماعندناش مضبطة حنشطب من المضبطة، ولا حاجة من
الكلام دا، مافيش شطب من المضبطة، ولا عندناش لائحة (ضحك)، ولكن علشان نكون على
بينة من كل شئ، أنا مستعد أتكلم معاكم فى كل شئ، وأجاوب على أى سؤال، ونقول أى كلام
بدون حرج وما نخافش. وبعدين إذا حد اتكلم كلام الباقيين مش موافقين عليه هو له
حريته انه بيتكلم هذا الكلام، وإذا كان مثلا سمع إن حد من أعضاء هذا المجلس فعلا
بيشتغل فى الشيوعية، دا موضوع خطير جداً لازم يقول لنا عليه.( تصفيق).
- السيد
أحمد سعيد: لم أكن أقصد عندما تحدثت عن بعض الشيوعيين فى أجهزة الصحافة، لم أكن
أقصد السيد الزميل خالد محيى الدين؛ وإنما قصدت بعض الذين خرجوا من المعتقلات فى
مارس الماضى، والذين يكتبون الآن فى الصحف، وبعضهم كتب فعلا ضد الدين وضد الأديان،
وبعضهم حاول أن يدخل فى أذهان القراء بعض المفاهيم الشيوعية، وهذا ما قصدت إليه.
وأود أن أذكر أيضاً أنه فى نفس اللحظة التى وضع فيها بعض الشيوعيين فى بعض الصحف،
أقصى عن الصحافة بعض الذين كانوا يعملون بها.. هذا ما قصدت إليه.
*
الرئيس: بالنسبة لاندماجهم فى مجتمعنا الاشتراكى الجديد، بالنسبة لسؤالك
الخاص.. حقيقة وجهة النظر الخاصة بإتاحة فرص الحياة للشيوعيين على أمل اندماجهم فى
مجتمعنا الاشتراكى الجديد، الإجابة ثابتة الآن.
- السيد
أحمد سعيد: أنا موافق على محاولة أن ندمجهم فى المجتمع، ولكن أرجو أيضاً ألا
يتبوءوا بعض المراكز الحساسة فى هذه الفترة التى نباركها.
*
الرئيس: طبعاً هو بالنسبة لأى واحد يكتب ضد الدين نعتبره انحرف وخرج عن
الميثاق، وإذا كان حد كتب ضد الدين تبقى تقولنا مين اللى كتب ضد الدين وتبين لنا
هذا الموضوع. طبعاً إذا حد دعا لأى شئ غير الميثاق ودعا للشيوعية بيكون فعلا فيه
انحراف؛ لأن المفروض إن أجهزة الصحافة حرة فى حدود الميثاق.
بالنسبة
لإتاحة الفرص للشيوعيين احنا على استعداد لإتاحة الفرص لهم جميعاً إنهم يمشوا فى
مجتمعنا، ويأخذوا أوضاعهم، ويعملوا يعنى على أساس الالتزام بالميثاق، وعلى أساس إن
مانخدش طعنات فى ظهرنا، وعلى أساس إن مافيش تنظيم؛ لأن أى واحد حيعمل تنظيم شيوعى
سنعتقله، إن دعا الأمر إلى إن احنا نطلب من المجلس - زى ما هم عاملين فى الهند - إن
المجلس يعمل لجنة علشان نعتقل بدون محاكمة الناس اللى بيتصرفوا ويخرجوا عن الميثاق
- الهند فيها لجنة بهذا الشكل موجودة فى المجلس - وبندى لوزير الداخلية الحق فى
اعتقالات معينة. واحنا قريناً مثلاً فى الأسبوع الماضى انهم اعتقلوا آلاف مؤلفة من
الشيوعيين هناك، فحكاية تنظيم شيوعى، لن نسمح بقيام تنظيم شيوعى، كما لن نسمح بقيام
تنظيم رجعى، التنظيم الوحيد الموجود هو الاتحاد الاشتراكى.(تصفيق).
وبعدين هذا
الاتحاد الاشتراكى ماهواش حزب؛ لإنه يمثل قوى الشعب العاملة، كون حد يقول لى إن أنا
حزب، وييجى يعمل معايا جبهة، باقول له لا أنا مش حزب، وعلشان كده أنا ما أقدرش أعمل
معاك جبهة، أنا بامثل قوى الشعب العاملة.
- سؤال
من السيد العضو عبد الهادى عبد الجواد: لماذا لا تقيم الدولة مصنع غزل أو نسج
بمركز أجا؟ ( ضحك).
*
الرئيس: طبعاً يعنى كل مركز عايز مصنع غزل ونسيج، وتلاقى المصنع خدته زفتى
وشبين الكوم أو ميت غمر، يعنى حد من الجيران أخد المصنع (ضحك)، واحنا ياريت نقدر
نعمل مصنع فى كل قرية، واحنا خطتنا بالنسبة للتصنيع إن احنا بنحاول نركز كل ما يمكن
تركيزه من الاستثمارات من أجل التصنيع.
- سؤال
من السيدة العضو عائشة حسنين: ألا يكون من الأوفق تواجد المتخصصين فى العلوم
والجيولوجيا فى مجال عملهم الطبيعى بين الصحارى والمزارع، ومدهم بإمكانيات البحث
والتنقيب؛ لنستغنى بذلك عن الخبراء الأجانب؟
*
الرئيس: باعتقد إن فيه كفاءات موجودة، وممكن السيد وزير الصناعة يبقى يجاوب على
هذا السؤال.
- السيد
نائب رئيس الوزراء للصناعة، فيه ناس مختصين موجودين فى الصحارى وفى أمكنة
نائية.
- سؤال
من العضو السيد إسماعيل السيد إسماعيل: ما هو الداعى لأن يشغل منصب مدير شركة
ما غير متخصص بالعمل الذى يشغله، بينما نجد الكفاءات داخل المصنع أو الشركة
وبالخارج معطلة؟
*
الرئيس: السيد العضو إسماعيل السيد إسماعيل إذا كان عنده مثال على هذا بيقوم
يتكلم دلوقت ويقول لنا إيه اللى خلاه قال هذا الكلام ؟
- السيد
إسماعيل السيد إسماعيل: فيه شركات يبقى مدير المصنع بتاعها عنده شهادة ثقافة
بينما فيه مهندسين مختصين موجودين فى نفس المصنع وخارج المصنع، إيه الداعى؟
*
الرئيس: إيه المصنع؟ يعنى أنا عايز أعرف إيه المصنع؟
- السيد
إسماعيل السيد إسماعيل ........ (ضحك).
*
الرئيس: هو أنا باقول إن لازم فيه حالة خلتك قدمت هذا السؤال.
- السيد
إسماعيل السيد إسماعيل... ما أعرفش أنا والله.(ضحك).
وأنا ما
أعرفش طبعاً الموضوع بالتفصيل، لكن اللى أنا متصوره إن المصنع دا كان أنشئ برأس مال
خاص وبعدين اتأمم، مش كده ؟
*
الرئيس: يعنى أنا عايز أسمع الكثير اللى أنت بتقول عليه، يعنى مش ممكن تقف
وتقول لى مصنع حديد فيه بالثقافة، باقول لك متأسف هذا الكلام مش صح.
- السيد
إسماعيل السيد إسماعيل: أنا ماحددتش بالضبط.
*
الرئيس: وأنا باقول لك السبب اللى أنا مثلاً عالق فى رأسى من ميت غمر، واحد عمل
المصنع وابتدأ جمع فلوس واجتهد، واتعين مديره، وبعدين أتأمم واستمر الحال على ما هو
عليه.
- سؤال
من السيد العضو مصطفى أبو ريه: ما هى الخطة التى تراها الدولة لزيادة الكفاية
الإنتاجية فى كل من القطاعين العام والخاص والارتفاع بمستوى العاملين بهما؟
*
الرئيس: برضه نسيب هذا الموضوع للسيد نائب رئيس الوزارة للصناعة، طبعاً فيه خطة
بالنسبة لزيادة الكفاية الإنتاجية.
- سؤال
من السيد العضو نزيه أحمد أمين: إلى أى مدى قومت الخطة الخمسية الأولى؟ وهل
أضيفت المشاكل التى اكتشفت عند تنفيذها إلى المشاكل المحتمل قيامها عند تنفيذ الخطة
القادمة؟ وهل أعدت العدة لمراعاتها فى التنفيذ؟
*
الرئيس: باعتبر ان مجلس الوزراء بيبحث هذا الموضوع، وأعتقد ان السيد رئيس
الوزراء يقدر يجاوب على هذا السؤال، واحنا لسه فى اللجنة العليا ماشفناش الخطة
الخمسية الثانية، ولكن بنقّوم فى الخطة الخمسية الأولى.
- سؤال
من السيد العضو عبد المنعم إسماعيل عمر: طلب كلمة للاستفسار عن نقطة خاصة
بالادخار عند الفلاحين بصفة عامة، وفلاحى الإصلاح الزراعى بصفة خاصة.
*
الرئيس: الادخار بالنسبة للفلاحين.. احنا بحثنا هذا الموضوع على أساس انه ممكن
نعمل تأمين اجتماعى للفلاحين ونبتدى بالإصلاح الزراعى، هو دا أول وسيلة نستطيع ان
احنا نعمل بها ادخار للفلاحين.
- سؤال
من السيد العضو عبد الهادى عبد الجواد: لماذا لا تعمل الدولة على تهجير جزء من
اليد العاملة المتعطلة بمركز أجا دقهلية إلى مناطق الإصلاح الزراعى الجديدة؟
*
الرئيس: والله أنا برضه ما باعرفش، ما أقدرش أجاوب على السؤال دا؛ لأن أنا مش
عارف إية الحكاية فى مركز أجا، برضه ممكن يعنى إيه، أنا بدى أقول لكم حاجة إن أنا
الأسئلة دى شفتها بعد الظهر مبوبة، وماكانش عندى وقت طبعاً أسأل حد من الوزراء، ولا
أسأل حد من رئيس الوزارة أو نواب رئيس الوزارة بحيث انهم يردوا على الأسئلة اللى
عايزه استفسارات، زى تهجير جزء من مركز أجا، الحقيقة ما أقدرش يعنى أرد عليه،
وبعدين طبعاً يمكن الأسئلة دى كانت أسئلة تتقدم للوزراء فى مجلس الأمة أكثر من انه
يتقدم فى الجلسة دى.( تصفيق).
- سؤال
من السيد العضو محمود سيد أحمد صقر: لماذا لا يعتمد التمليك بالشراء من الأجانب
بالعقد والبحث أسوة بتمليك الإصلاح الزراعى للمعدمين؟
* الرئيس
عبد الناصر: أهو أنا ما أعرفش أجاوب ولا على كلمة فى الموضوع.. اللى عاوز يعرف
أنا يعنى أنا عمرى ماعملت عقد بيع ولا تمليك ولا بأملك حاجة فى البلد دى.(تصفيق).
* السيد
محمود سيد أحمد صقر: ... من الأجانب، لما بيكون معاهم عقد عرفى من البايع
يطلبوا منهم تسجيل هذا العقد أو أى إجراءات رسمية على هذا العقد علشان يسجل لهم،
فيطلبوا منهم هذه الإجراءات، فيطلب فيه، وبيقول انه بالبحث أو لجان البحث بالإصلاح
الزراعى يمكنها إنها تبحث هذه العقود وتثبت أنها كانت تحت يدهم لأن لهم حيازات ولهم
بطاقات زراعية ، ولهم سلف على هذه الأطيان قبل البيع وقبل.. فبنقول إن دول يمكن بحث
حالتهم علشان معاملتهم معاملة الإصلاح الزراعى.
*
الرئيس: أنا باعتبر ان هذا ممكن تقدمه كاقتراح لوزير الزراعة، ووزير الإصلاح
الزراعى، وأنا شايف انه مش موضوعنا، يعنى أنا برضه، يعنى أنا عايز تدونى أسئلة أقدر
أجاوب عليها، إلا إذا افتكرتم إن أنا حاقدر أجاوب على أسئلة وزير العدل ووزير
الزراعة ووزير التعليم والكلام دا، مش ممكن، يعنى عملية مستحيلة، وبعدين مش الغرض
من الجلسة، الحقيقة أنا بدى أجاوب على الأسئلة اللى ما تقدروش تحصلوا على أجابه
عليها من الوزرا ومن مجلس الوزرا، تكون الأسئلة العامة.
- سؤال
من السيد العضو محمود سيد أحمد صقر: يطلب إعادة النظر فى قانون الإصلاح الزراعى
بالنسبة لصغار الملاك لخمسة أفدنة فأقل.
*
الرئيس: وأنا باعتبر دا موضوع عام، فين السيد أحمد صقر؟
- السيد
محمود سيد أحمد صقر: اللى بيملكوا خمس أفدنه فأقل، الإصلاح الزراعى بيملك الناس
اللى.. خمسة أفدنه فأقل، ودول فى بعض الأحيان بيكونوا غير فلاحين؛ إنما أولادهم
كانوا صغيرين، ولما كبرت أولادهم وعايزين يشتغلوا.. الأطيان دى تحت يد مستأجرين،
فهم عايزين ينتفعوا ويشتغلوا أولادهم، فعايزين الأطيان دى يستعيدوها علشان يشتغلوا
فيها وعلشان يعيشوا منها.... يعوض الجماعة الذين... يبقى اللى عنده أطيان زراعية
أكثر من ٢٥ فدان، يزرع ٢٥ فدان والباقى تحت إيديه للجماعة اللى حنأخد منهم الأطيان
لصغار الفلاحين. الجماعة الموظفين اللى ليهم أطيان بيزرعوها على حسابهم نأخد هذه
الأطيان من الموظفين ونديها للجماعة اللى حنملكهم ٥ فدادين فأقل، ونخليهم يزرعوها
ويستأجروها من الموظفين، وبذلك مش حنحرمهم برضه من الشغل، أو من الإيجار أو غير...
الجماعة الصغيرين اللى عايزين يشتغلوا.
*
الرئيس: نبحث طبعاً هذا الموضوع.. قدم اقتراح سيادتك فى المجلس، مقدّم اقتراح؟
- السيد
محمود سيد أحمد صقر: مقدم اقتراح من زمان.
- سؤال
من السيد العضو محمود سيد أحمد صقر: لماذا لم تعط الحكومة الموظفين الذين كانوا
يعملون بأطيان الأجانب أرضاً منها عندما وزعتها على المعدمين؟ وهل يمكن توظيفهم إذا
لم يمكن إعطاؤهم من هذه الأطيان.
- السيد
محمود سيد أحمد صقر: برضه كان فيه جماعة عند الخواجات عايشين...
*
الرئيس: برضه موضوع نبحثه.
- سؤال
من السيد العضو محمد عبد الله نصار: ما رأى السيد رئيس الجمهورية فى مشروع قناة
ناصر التى تروى الوادى الجديد؟
*
الرئيس: هو الموضوع كله تحت الدراسة، هل دا اللى حيكون أوفر أو المشروع الثانى
الخاص بكوم أمبو حيكون أوفر؟ أنا لسه ماليش رأى فى الموضوع دا.
- سؤال
من السيد العضو صبرى القاضى: ألا يحسن إعطاء موضوع الرى والصرف العناية الكافية
لرفع مستوى الإنتاج؟
*
الرئيس: أنتم يظهر لميتوا على الأسئلة اللى مقدمينها من أول الدورة ( ضحك)
بعدين أنا رأيى بنعمل الحقيقة، بتعملوا جلسات للأسئلة مع الوزراء أكثر من كده
وتحطوا هذه الأسئلة كلها... فى رأيى تعملوا جلسة زى دى حتى مع الوزرا كلهم بيكونوا
موجودين وتتجمع الأسئلة كلها، مش ضرورى يجاوب على سؤال سؤال، يعنى كل الأسئلة
الخاصة بوزير الصناعة بتروح له، ووزير الزراعة بتروح له، بيقف يجاوب على كل الأسئلة
بحيث ان الموضوع الـ... اللى أنا شايفه انكم لميتوا لى الأسئلة كلها اللى أتأخر
الرد عليها وبعتوها لى.
- سؤال:
ألا يحسن إعطاء موضوع الرى والصرف العناية الكافية لرفع مستوى الإنتاج الزراعى
وإخضاع المسئولين عن أجهزته للحكم المحلى؟
*
الرئيس: طبعاً دا موضوع فيه كثير وخصوصاً بعد السد العالى، موضوع الصرف حيختلف
عما هو الآن ولكن برضه الموضوع دا بنسيبه لوزير الرى.
- سؤال
من السيد العضو محمود سيد أحمد: يطلب توزيع المواد التموينية والبذور والأسمدة
بمعرفة البنك حتى يمكن تلافى المخالفات وكثرة التكاليف.
سؤال من
السيد العضو.. ( ضحك ).
*
الرئيس: طبعاً أنا عندى واحد تانى..
- سؤال
من السيد العضو إبراهيم على القاضى: الحاجة إلى إنشاء وزارة للتجارة الداخلية
لتنظيم القطاع الخاص والنشاط الفردى وإحكام الرقابة عليه وتحسين العلاقة بين أجهزة
التموين والمجمعات الاستهلاكية وصغار التجار.
*
الرئيس: فعلاً احنا دلوقت بننظم وزارة للتجارة الداخلية.
- سؤال
من السيد العضو عبد الجابر علام: ما مدى مساندة الدولة لنظام الإسكان التعاونى
حيث أنه حرم فى الفترة الأخيرة من العناية؟
*
الرئيس: برضه باقول هذا السؤال للسيد على صبرى ليرد عليه... اللى أنا فاهمه
طبعاً إن عملية الفيلات عملية فيها فخفخة، والقروض ليها الحقيقة أحسن نوجهها
لعمليات الإسكان الشعبى والإسكان المتوسط، لكن كل واحد عايز يعمل فيلا ندى له قرض
مش معقول أبداً؛ لأن ممكن بالقرض اللى نديه له نبنى شقتين وثلاث شقق علشان الإسكان
الشعبى والإسكان المتوسط، دا اللى أنا فاهمه من الموضوع. (تصفيق).
- سؤال
من السيدة العضو عائشة حسنين: تطلب حلاً لمشكلة الإسكان والمواصلات بالعاصمة،
نقل بعض المصانع إلى المحافظات ووزارة الزراعة إلى مديرية التحرير وذلك أسوة..
(ضحك)... وذلك أسوةً بوزارة السد العالى الموجودة فى أسوان.
*
الرئيس: هى طبعاً مشكلة الإسكان مهياش بس فى العاصمة، يعنى هى موجودة فى كل
حته، بدليل الموظفين اللى عايزين نوديهم فى أى مناطق، عايزين أيضاً نبنى لهم، بعدين
اللى بدى أقوله إن احنا فى الخطة عندنا مبلغ محدد، اللى بنقدر نستفيده فى الخطة،
هذا المبلغ بنحدد منه جزء للإسكان.. الحقيقية مانقدرش نزود عن هذا الجزء؛ لأن إذا
حطينا جزء أكثر فى الإسكان من جزء التصنيع حنبص نلاقى عندنا عمال عاطلين، فعملية
الإسكان وأزمة الإسكان احنا حنفضل فيها لفترة، ولكن بقدر جهدنا نغطيها، لكن مش حلها
ان ننقل وزارة الزراعة طبعاً لمديرية التحرير، لسبب حانقل وزارة الزراعة لمديرية
التحرير لازم حابنى وزارة وأبنى مساكن للناس اللى حيروحوا هناك وإلا إيه؟ هو لو
ننقلهم للوادى الجديد يكون أحسن. (ضحك).
- سؤال
من السيد العضو إبراهيم سيد قرشى: ماهى الخطط التى أعدت للتنمية الأخلاقية التى
يعانى منها وطننا فى فترة التحول العظيم طبقاً لما جاء بالميثاق من أن الأديان
قادرة على هداية الإنسان وعلى إضاءة حياته بنور الإيمان.
*
الرئيس: طبعاً تعليم الدين فى المدارس تعليم أساسى، وأنا أعتقد إن الحقيقة إن
التنمية الأخلاقية أساساً بتطلع من البيت، يعنى هو اللى عليه المسئولية دى، واحنا
علينا مسئولية فى التوعية، وفى تنظيمنا السياسى علينا مسئولية فى التوعية، وتصميمنا
أيضاً على الأخلاق هو اللى بيخلى الأخلاق تتمكن من نفوس الناس، يعنى لو كل واحد
يربى أولاده بنبص نلاقى عندنا فعلاً مجتمع فيه أخلاق سليمة، المدرسة بس ما تكفيش
أبداً، تعليم الدين بس ما يكفيش (تصفيق).. وبعدين علينا نقول للناس هذا الكلام
الحقيقة.
يطلب السيد
العضو محمد شحاته الزعيرى الكلام عن موضوع الجمع بين عضوية المجلس والوظائف العامة.
*
الرئيس: أنا اتكلمت فى هذا الموضوع إذا حب هو يتكلم وشايف....
- سؤال
من السيد العضو أحمد موسى سالم: لماذا لا يسير الإعلام بكافة أجهزته على أساس
موجه صريح حيث يبدو كما لو كان متناقضاً مع رسالته الثورية.
*
الرئيس: اتكلمنا فى هذا الموضوع فى الأول.
- وسؤال
من السيد العضو عبد العزيز مصطفى: يطلب مناقشة موضوع الصحافة.
*
الرئيس: فين السيد العضو عبد العزيز مصطفى؟
* السيد
عبد العزيز مصطفى: هو الحقيقة النقد اللى توجهه الصحف إلى موضوع المجارى..
والهجوم على القطاع العام.
*
الرئيس: هو طبعاً موضوع نقد
المجارى أنا مع الصحافة؛ لأنها نبهتنا إلى مشكلة المجارى (تصفيق).. وفعلاً المجارى
فى القاهرة فيها مشكلة عايزه حل ثورى وان احنا.. واتكونت لجنة علشانه وخدت اختصاصات
علشان نحل موضوع المجارى، وإلا إذا ترك الأمر على ما هو عليه الحقيقة ممكن القاهرة
تتعرض لأوبئة.
الحقيقة
بالنسبة للصحافة، يعنى أما بنشوف مواضيع بهذا الشكل بنستطيع ان احنا نلفت النظر،
لكن مش حاقدر أوقف ورا كل صحفى واحد علشان يعمل مراجعة للكلام اللى بيقوله،
وبالنسبة للتصدى للقطاع العام احنا عايزين أيضاً نقد بالنسبة للقطاع العام، مش
عايزين القطاع العام يعتبر إنه فوق النقد، ولكن إذا زاد النقد عن حده أو كانت فيه
حاجات غير حقيقية - ودا التوجيه اللى أنا مديه - يجب ان احنا... مش عايزين أولاً
حاجات مبنية للمجهول، مش عايز يطلع يقول لى إن مثلاً فيه مدير مصنع ضبطوه بشىء،
ويقول على مدير المصنع مدير مصنع بس، لأ؛ أحسن يقول الاسم، مش عايزه يقول إن شركة
من شركات القطاع العام وجدوا فيها اختلاس ٢٠ ألف جنيه؛ لأن دى بتشكك فى القطاع
العام، لكن يقول إن الشركة الفلانية وجد فيها اختلاس عشرين ألف جنيه، وبأعتقد إن
موضوع الصحافة إن احنا مانبقاش يعنى حساسين منه، فيه إمكانية لتصحيح أى وقائع غير
صحيحة تنشرها الصحافة، ولكن علشان الصحافة تكون حية لازم مانقيدهاش فى إطار ضيق.
- سؤال
من السيد العضو أحمد حرك: لماذا نقل بعض الصحفيين إلى أعمال غير صحفية كما حدث
بجريدة الجمهورية؟ وما حقيقة ما نشر حول إغلاق جريدة المساء؟
*
الرئيس: آه.. يعنى الموضوع دا
الحقيقة موضوع لازم يتفهم على حقيقته.. جريدة الجمهورية بتخسر، عليها ديون ٣٥٠.٠٠٠
جنيه، وبعدين الحقيقة أنا غير مستعد إن أنا أدى إعانات للصحف، الأهرام كسبانة نص
مليون جنيه، الأخبار كسبانة، الهلال كسبانة، روز اليوسف كسبانة، عندنا مشكلة
الجمهورية، الحل الصحيح إن احنا نقفلها، نقفلها خالص، ولكن الجمهورية هى الجريدة
اللى طلعت فى وقت الثورة... فما نقدرش نقفلها إذن نقوم الأوضاع الموجودة فيها.
- سؤال
من السيد العضو علوى حافظ: مدى سرية البيانات التى ذكرها السيد المشير عبد
الحكيم عامر أمام مجلس الأمة عن اليمن، وعما إذا كان يمكن أن تعى وتسمع قوى الشعب
العاملة نسبة كبيرة من هذه البيانات؛ لتبديد ما علق بأذهانها من المصادر الملوثة
والإشاعات والإذاعات المغرضة.
*
الرئيس: أنا باعتقد إن كل
البيانات التى قالها المشير عبد الحكيم عامر امبارح ممكن تنقال ما عدا عدد قواتنا
فى اليمن قد إيه، مافيش داعى نقول قد ايه فى اليمن، وما عدا الكلام الخاص بالمناطق
وخططنا وإن لينا خطط بالنسبة لهذه المناطق.. الكلام الخاص بالخسائر بنقدر نقوله،
وأظن انه حيتقال.
والسيد أنور
السادات حينشر جزء بعد ما يتكلم معاكم فى هذا الموضوع.
- سؤال
من السيد العضو أحمد سعيد: يطلب تقييماً شاملاً لنتائج مؤتمرى القمة وحساب
الربح والخسارة منهما بالنسبة لمد الحركة الثورية التحررية؛ سواء ما اتصل منها
بالجمهورية العربية المتحدة كطليعة، أو ما اتصل بالحركات فى الوطن العربى كله.
*
الرئيس: الحقيقة زى ما قلت لكم فى ديسمبر سنة ٦٣ كان الوضع العربى بالنسبة
لإسرائيل وضع ضائع، إسرائيل كان عندها مطلق الحرية للتصرف، والدول العربية لا
تستطيع أن تتصرف، وزى ما قلت سوريا قالت إنها لا تستطيع أن تحول نهر بانياس اللى هو
أحد مجارى نهر الأردن؛ لأنها تخاف من أن تقوم إسرائيل بالهجوم واحتلال مجرى النهر،
أما وصل الأمر إلى هذا الحد وكانت الدول الأجنبية الاستعمارية وإسرائيل تلعب دائماً
على أساس الخلافات العربية، وكان باين إن الخلافات العربية وصلت إلى مداها، اللى
ابتدا يعود بالضرر على القضية العربية والقضية الفلسطينية. نتائج مؤتمر القمة - زى
ما قلت - ان احنا عملنا القيادة العربية الموحدة، إن احنا زودنا تسليح الدول
العربية المتاخمة لإسرائيل، إن احنا جبنا المغرب العربى معانا لأول مرة بالنسبة
لقضية فلسطين، ان احنا قدرنا ان احنا نعمل كيان فلسطين، ان احنا قدرنا أن نقيم
منظمة التحرير الفلسطينية، ان احنا قدرنا أن نقرر قيام جيش فلسطين، ان احنا عملنا
ميزانية لجيش فلسطين، عملنا ميزانية لمنظمة التحرير الفلسطينية، عملنا ميزانية
بمائة وخمسين مليون جنيه لتسليح الدول العربية، دا طبعاً بالنسبة لقضيتنا مع
إسرائيل، وهى القضية الأولى فى الوطن العربى، بيعتبر نجاح كبير جداً.
بالنسبة
لحركات التحرير، طبعاً فيه بعض حركات أو الحركات الثورية التحررية، الحركات الثورية
التحررية فى أى بلد تستطيع أن تعمل، واللى أنا باقوله: طالما فيه ظلم، وطالما فيه
ضغط، وطالما فيه إرهاب، وطالما فيه استغلال، يبقى لابد للحركات الثورية من أن تنمو،
ولن يستطيع أى إنسان انه يعمل بالنيابة عنها، ولكن كونا احنا نحارب لهذه الحركات
الثورية؛ سواء كانت ثورية اسماً أو فعلاً، بإن احنا ندخل فى مشاكل وسباب مستمر مع
البلاد العربية فعلاً؛ بيكون فيه خسارة على القضية الفلسطينية والقضية العربية.
ومثلاً بادى
مثل فى ألمانيا، فى صدامنا مع ألمانيا - الأخير - حاولت ألمانيا بكل الوسائل انها
تجذب إلى جانبها بعض الدول العربية؛ ولكن وجدت أن الأمر صعب، لم تجد الدول العربية
لنفسها أو أى من الدول العربية لنفسها سبباً من أن تتنصل من أن تؤيد الجمهورية
العربية المتحدة، إذن فيه مكاسب كسبناها كثيرة جداً، قد يكون تصورنا لقضية الثورة
فى العالم العربى كان متفائل قوى، ولكن أنا فى رأيى أن هذا النجاح لم يؤثر من ناحية
التوقيت على قضية الثورة أو نجاح الثورة فى العالم العربى... لا زالت فيه أزمات
بالنسبة لقضية الثورة فى العالم العربى؛ من ناحية العمل السياسى، ومن ناحية
التنظيم، فيه تيار ثورى كبير، ولكن هذا التيار غير منظم، وهذا التيار يحتاج إلى عمل
وصبر حتى ينظم.
- فيه
سؤال: ما دام القضاء على ربيبة الاستعمار إسرائيل شىء لابد منه فلماذا لا تقوم
الدول العربية مجتمعة بالقضاء عليها، وذلك قبل أن تقوى وحتى نتخلص منها نهائياً ؟
*
الرئيس: المشكلة اللى قدامنا مش بس إسرائيل، ولكن المشكلة اللى قدامنا، من هى
القوى التى وراء إسرائيل، دى أول مشكلة، ثم المشكلة الثانية هل الدول العربية
النهارده مجتمعة تستطيع أو وصلت إلى حد يمكنها من أن تتفق هذا الاتفاق أو اتفاق
كامل على تحقيق مثل هذا الهدف؟ احنا لسه عايزين مجهود كبير فى هذا السبيل.
- سؤال
من السيد العضو أحمد سعيد: يطلب بياناً بما يترتب على قرار حكومة ألمانيا
الغربية بوقف العلاقات الاقتصادية مع الجمهورية العربية المتحدة على اقتصادنا
وصناعتنا، ويستوضح موقف الحكومات العربية ومدى مسايرتها وتأييدها لنا وجدوى ذلك
التأييد، ويسأل عن حساب الأرباح والخسائر بالنسبة لألمانيا الشرقية وألمانيا
الغربية فى إطار مبادئنا فى السياسة العالمية.
*
الرئيس: قرار حكومة ألمانيا الغربية بوقف العلاقات الاقتصادية مع الجمهورية
العربية، هذا القرار إذا طبق على الاتفاقيات اللى احنا وقعناها؛ فاحنا علينا ديون
ليهم سبعين مليون جنيه، سنعاملهم بالمثل، إذا نقضوا هم الاتفاقيات احنا أيضاً سننقض
الاتفاقيات ومش حندفع السبعين مليون جنيه... (تصفيق) أما بالنسبة للقروض.. بالنسبة
للقروض، الحقيقة احنا فى خطتنا الخمسية ماكناش معتمدين على ألمانيا الغربية إلى حد
كبير؛ لأن شروط ألمانيا الغربية بالنسبة لينا شروط قاسية، ندفع ٦% أو ٧% فوايد،
الحقيقة إذا قدرت آخذ من الشرق بـ ٢.٥% أحسن؛ لأن أنا من الغرب أو من ألمانيا
الغربية لما باتفق أول الاتفاق بأدفع مقدم، وعند توصيل الطلبات بأدفع، وبعدين أدفع
على أقساط ٦% أو ٧% ، مع الشرق ما بديش أدفع إلا بعد ما يتم المصنع بسنة، ما بأبقاش
مزنوق فى هذه العملية، ومن إنتاج المصنع بأقدر أدفع.
فى قطع
العلاقات الاقتصادية مع ألمانيا الغربية فى رأيى إن ألمانيا الغربية تخسر، ليه؟ لما
نبص لميزاننا التجارى مع ألمانيا الغربية السنة اللى فاتت - سنة ٦٤ - هم استوردوا
منا بـ ١٣ مليون جنيه، احنا استوردنا منهم بـ ٤٣ مليون جنيه؛ إذن الفرق فى الميزان
التجارى لصالحهم ٣٠ مليون جنيه، وبعدين طبعاً فرنسا وإيطاليا وإنجلترا إذا احتجنا
لدول غربية مستعدين إنهم يدونا بنفس الشروط اللى بتدينا بها ألمانيا الغربية، بل
أكثر من هذا مصانع ألمانيا الغربية نفسها رغم قطع العلاقات الاقتصادية - اللى هم
بيقولوا عليها - مستعدة إنها تدينا بنفس الفوائد وبنفس الشروط، حيفضل بعد كده،
مشروعات الإنشاءات اللى احنا بناخدها منهم بـ ٣%، واحنا قررناً أخيراً إن أكثر هذه
المشرعات ناخدها من الدول الشرقية؛ لأنها بتدينا بـ ٢.٥%، ما بتطلبش مننا ان احنا
ندفع بعملة صعبة، بتطلب مننا ان احنا ندفع بعد ما ينتهى العمل فى هذه المشروعات.
موقف الدول
العربية: اللى أيدنا فى هذا الموضوع الحقيقة أساساً العراق والجزائر، الكويت أيدتنا
أيضاً، وبعدين الملك حسين وهو هنا قال إنه بيؤيد موقفنا، بورقيبة وهو هنا قال إنه
بيؤيد موقفنا، طبعاً لبنان وليبيا والسودان والسعودية وفى اليمن أيدت موقفنا،
والمغرب، طبعاً ألمانيا الغربية حاولت تروح للدول زى ما راحوا للرئيس بن بيلا
وقالوا ان احنا القروض اللى كنا حنديها لمصر مستعدين نديها لكم، ومستعدين ندى
بفايدة أقل، ولكن هذا كله لن ينفع ألمانيا الغربية.
- سؤال
من السيد العضو على محمد أبو حسين: يطلب إعادة تقسيم المحافظات وتبعية بلدة
منشأه القناطر إلى محافظة القليوبية وفصلها من محافظة الجيزة.
- سؤال
من السيد العضو عبد الرءوف فهمى خليل: ما رأى السيد رئيس الجمهورية فى أن تغيير
السادة المحافظين فيه دفع جديد لتعميق المفهوم الديموقراطى فى المجال الشعبى على
مستوى جميع التنظيمات، وإيجاد جو من التفاهم بين التنظيمات الشعبية والجهاز
التنفيذى؟
*
الرئيس: أنا أحب أن أسمع للسيد عبد الرءوف فهمى خليل.
(تكلم السيد العضو عبد الرؤوف فهمى خليل عن أن المحافظين عينوا قبل قيام مجلس الأمة،
وأن بعض المحافظين لهم صداقات ببعض من سقطوا فى الانتخابات، وهذا يسبب بعض الحساسية
فى علاقاتهم ببعض أعضاء مجلس الأمة، وأن فى إجراء حركة تنقلات بين المحافظين يزيل
هذه الحساسية ويفتح صفحة جديده من التعاون بين المحافظين الجدد وأعضاء مجلس الأمة.
وتكلم بعده
عدد من السادة الأعضاء ودافعوا عن محافظ البحيرة الذى قصده السيد عبد الرؤوف فهمى
بكلامه، وتحدث أحد أعضاء المجلس عن محافظة الدقهلية عن موقف المحافظة بالنسبة له لو
زميل أخر من زملائه نتيجة لاستخدامه حق النقد ونشره نقداً لبعض الأعمال التى تجرى
فى المحافظة، وما نشر عن ذلك من أن أمره وأمر زميله معروض على لجنة الاتحاد
الاشتراكى لتقرير فصلهما من الاتحاد الاشتراكى).
*
الرئيس: أسمحوا لى أعلق بقى على الموضوع دا، أنا شايف إن كتير منكم عايزين
يتكلموا، واحنا بقينا الساعة عشرة. الحقيقة الموضوع ليه جوانب مختلفة، والأخ اللى
اتكلم على البحيرة وقال ان فيه ١٩ فى جانب واتنين فى جانب، الحقيقة دا بيحتاج جهد
من الاتحاد الاشتراكى حتى يوفق بين الأعضاء كلهم وبين المحافظ. فيه تناقض طبعاً بين
عمل محافظ وأعضاء مجلس الأمة، فيه تناقض بين الأوضاع اللى فعلاً اللى اتكلمتم عليها
زى واحد كان موجود فى مجلس المحافظة واترشح قصاد واحد تانى، واحد كان يعرفه
المحافظ، الحقيقة أنا مش شايف أبداً ان دى مشاكل كبيرة ولكن الاتحاد الاشتراكى يقدر
يحل كل هذه المشاكل، والأخ أنور أيضاً يقدر يحل كل هذه المشاكل، يعنى الأخ أنور
بيجيب نواب البحيرة وبيطلب محافظ البحيرة، وبيجيب الأمين العام للاتحاد الاشتراكى،
والعمليات دى حتبقى مع المحافظ القديم، وإذا جا محافظ جديد أيضاً؛ فيه ناس حيتلموا
عليه وناس مش حيتلموا عليه، نفس العملية لم تنته أبدا؛ً لأن العملية عملية بشرية،
واحد كلامه لطيف، وواحد كلامه زى المنشار حتعمل إيه بين دا وبين دا.(تصفيق).
الحقيقة
كاتحاد اشتراكى نستطيع إن احنا نحل مشاكل كثيرة بهذا النوع.
- سؤال
من السيد العضو مصطفى أبو ريه: ماهى خطة الحكومة نحو توفير قطع الغيار والكاوتش
للسيارات والجرارات ؟ ( ضحك).
*
الرئيس: هو فيه خطة طبعاً، وفيه فلوس، طبعاً احنا، يعنى أنا بدى بالنسبة لهذا
الموضوع أتكلم على نقطة معينة.. على أد ما نصدر على أد ما نستورد، بتطالبونا ان
احنا نستورد قمح ونستورد درة ونستورد لحمه، ونستورد حاجات كتير جداً، إذا كنا
مابنصدرش حنستورد إزاى! ودا بيرجعنى للكلام اللى قاله الأخ سيد جلال عن الدرة، احنا
بنستورد دره من الخارج ونستورد من كل الدنيا يعنى من البلاد اللى فيها دره بنستورد،
بنستورد من أمريكا بنبيع بخسارة، ولكن الحقيقة الاستهلاك بيزيد وبرضه التصدير ما
بيحققش أهدافه، ما هى الدولة إيه؟ إذا صدرنا بـ ١٠٠ مليون جنيه نقدر نستورد بـ ١٠٠
مليون جنيه، أما إذا صدرنا بـ ١٠٠ مليون جنيه إزاى نقدر نستورد بـ ٢٠٠ مليون جنيه،
إلا ان احنا نستلف و أما نستلف نبقى لازم نسدد هذا الدين، فالحقيقة الموقف بالنسبة
للاستهلاك تعبنا جداً فى السنين الأخيرة؛ لأن الاستهلاك زايد جداً، وأنا إديت
الأرقام أول إمبارح، ٦٣١ مليون جنيه استهلاك سنة٥٢ إلى ١٤٦٥ سنة ٦٤، معنى هذا ان
احنا استهلاكنا زاد أكثر من الضعف، هل صادراتنا زادت؟ أسف. بنسبة أد إيه؟ نسبة ٥٠%،
علشان نستورد لازم نصدر، احنا عندنا الحقيقة، بنسمع الإذاعات ان احنا حنفلس، وعندنا
نقص فى العملة الصعبة، فعلاً عندنا نقص فى العملة الصعبة، أما رفعنا حتى سعر القطن
بعد ما اتباع فى الأول وقف بيع القطن للدول الغربية، وبعدين احنا استلفنا السنة
اللى فاتت من الكويت ٢٥مليون جنيه عملة صعبة، العراق ادونا وديعة بـ ١٥ مليون، من
صندوق النقد الدولى أخدنا حصتنا. فالحقيقة المرحلة الجاية عايزه مننا شغل كتير،
لازم نزود صادرتنا، لكن حكاية استورد طب أنا حاستورد منين؟ إذا كان ماعندناش عملة
صعبة مش حاقدر استورد، وبعدين الرز مثلاً زاد استهلاكه، واحنا كنا بنصدر رز، السنة
دى باين الاستهلاك زايد، القمح يعنى بنجيب قمح من أمريكا بما يساوى ١٠٠ مليون جنيه،
احنا الحقيقة عندنا مشاكل حتقابلنا السنين الجاية خاصة بالاستهلاك.
- سؤال
من السيد سعد أمين عز الدين: قلة أجور بعض طوائف العمال والحكومة والهيئات
العامة عن الحد الأدنى الذى نص علية القرار الجمهورى لمن يزيد سنه عن ١٨ سنة.
* الرئيس
عبد الناصر: هل فيه فى الحكومة عمال بياخدوا أقل من الحد الأدنى؟
فين السيد
سعد؟
( تكلم
السيد العضو سعد أمين عز الدين وبعض السادة الأعضاء، وأوضحوا فئات العمال التى
تتقاضى أجوراً تقل عن الحد الأدنى).
الأخ على
صبرى حيبحث موضوع العمال.
طب أنا يعنى
باقترح لهذا الموضوع إن اللى عنده مواضيع محددة بيقدم بيها مذكرات للسيد أنور
السادات، والسيد أنور السادات يديها للسيد على صبرى ونحل هذا الموضوع كله فى
الميزانية الجديدة. (تصفيق).
طب نمشى
بسرعة على الأسئلة.
(أصوات: هذا
يكفى فى هذا الاجتماع).
إن شاء الله
بعدما ترجعوا بالسلامة ونعقد جلسة فى أوائل شهر أبريل القادم بتكونوا مجهزين فيها
المشاكل اللى حتقابلكم فى أثناء طوافكم بالدوائر الانتخابية بتاعتكم، وبناخد
الأسئلة والمشاكل فى وقت بدرى، وبنجهز فيها حتى إخواننا يبقى عندهم وقت، إذا كان
ممكن تعمل الجلسة يومين تلاته ورا بعض حتى إذا دعا الأمر بحيث ان..(تصفيق) إذا كان
فيه مواضيع إخواننا بيردوا عليها؛ سواء إخواننا فى اللجنة العليا، أو إخواننا
الوزراء بيردوا عليها، ومتشكر جداً. (تصفيق حاد متصل). |